Sa ngalan ng bayan

sa ngalan ng huwad na kaunlaran
ang bayan nalubog sa putikan
mga punongkahoy sa kagubatan
kinalbo ng negosyanteng gahaman


sa ngalan ng pekeng progreso
tuloy ang byahe kahit bumabagyo
dahil walang pakialam sa pasahero
tumaob sa gitna ng laot ang barko


sa gitna ng matinding kalamidad
ang pangulo, sa ibayo lumipad
nagpasarap sa bansang maunlad
habang ang bansa'y nagluksa ng sagad


sa pabor ng ganid na kapitalista
ang interes ng bayan ibinenta
mga likas-yaman sa dayuhan pinaubaya
ang bansa walang awang sinisira


sa ngalan daw ng ekonomiya
ang taumbayan binulag sa pera
ipinilit mamuno ang mandaraya
maling pamamahala itinuring na tama