Malapit na naman ang Mahal na Araw

Malapit na naman ang mahal na araw.  Malapit na naman ako makakita ng nagpipinitensya.  Katangi-tangi ang pagdiriwang ng mahal na araw dito sa Pampanga.  Sikat doon sa may San Fernando yung nagpapapako sa krus.  Halos gayahin ang mga pangyayari kay Hesus, kulang na lang mamatay din sila at mabuhay pagkatapos ng ikatlong araw.


Abala rin ang buong lalawigan sa pagpapaganda ng kani-kanilang kapilya o lugar na pagdadausan ng pabasa, na isang pagsasalaysay ng buhay ni Kristo.  Hindi mawawala ang pabasa, ang pagkukwento ng pasyon  sa pamamagitan ng pagkanta.  Parang magulo noh?  Bakit pabasa ang tawag kung ito ay kinakanta?  Hindi ba mas mainam na tawagin itong pakanta?  O kaya ay patula?


Balik tayo sa penitensya.  Dahil kakaiba ang naging kaugalian ng mga Pilipino tuwing mahal na araw, dito makakakita ka araw-araw sa isang buong linggo simula lunes santo, ng mga nagpi pinitensya na naka taklob ang kanilang mukha, hubad na pang-itaas habang hinahagupit nila ang kanilang katawan kagaya ng pagpapahirap ng mga Romano kay Kristo.  Meron ding may pasan na krus, merong mga grupo naman sila, at kadalasan may mga kasamang umaalalay kung sakaling may hindi inaasahang mangyari.


Sa loob ng isang linggo sa isang taon ito ay nakikita sa halos lahat ng kalsada sa Pilipinas.  Sa loob ng isang linggo sa isang taon maraming namamanata at nagpipinitensya.  At sa loob ng isang linggo sa isang taon nagpapaka-kristiyano ang mga Pilipino.  Pero pagkatapos ng isang linggo, balik na naman sa dating gawi.  Sugal, alak, babae at kung anu-ano pang bisyo.  Kurakot sa posisyon, panloloko sa ibang kapwa, at kung anu-anong kasalanan na inihihingi ng kapatawaran tuwing mahal na araw.  Isang linggong debotong Kristiyano laban sa halos isang taon na puno ng kabalbalan na gawain.  Hindi ko alam kung sinu-sino sa mga nagpipinitensya ang totohanan, wala rin akong karapatang maghusga.  Pero sana lang wag tayong magpakitang tao lamang.  Hindi nagpapako sa krus si Hesus para lang magpakumbaba tayo sa Diyos ng isang linggo lang.


Hindi tayo nabuhay para maligtas ni Hesus sa mundo.  Naligtas tayo para mamuhay sa piling niya!


Malapit na naman ang mahal na araw... malapit na naman ba ang tangi mo lang pagkakataon para magsisi sa mga kasalanan?