Binabati ko kayo sa kamatayan ni Hesus...

Habang nagkaroon ako ng pagkakataon na gumala at magmasid sa kalsada, nakita ko ang mga bagong tarpolin na nakasabit sa mga kable ng kuryente at poste.  Akala ko congratulatory banner para sa mga bagong graduates, hanggang sa mapansin kong may anyo ng krus at kalbaryo sa background. Para pala sa pag-gunita ng Semana Santa, galing kay magiting na konsehal.


Pag-uwi ko naman narinig ang nagpapalahaw na ingay ng malakas na ispiker galing sa kapilya na naghahanda para sa pabasa.  Habang inaayos at nililinis ang kapilya, nakalagay sa isang lokal na istasyon ng radyo, at sunud-sunod ang mga naririnig kong mga pagbati galing sa mga lokal na opisyales dito sa lugar na tinitirhan ko sa kasalukuyan.


Nag-isip ako tuloy.  Papano mo babatiin ang isang tao para lamang gunitain ang sakripisyo ng anak ng Diyos upang tayo'y maligtas sa mga kasalanan natin?


Binabati ko kayo sa pagkamatay ni Hesus...